حكايات تحرق الدم وتعلي السكر ف الدم

 مره واحد داخل عليا الصيدليه بيقولي بكل تلقائيه :انا عايز " لحد هنا كويس وطبيعي" برشامه "طبيعي بردو برشامه صداع او برد" منوم " Error 404 وحسيت بدايات صداع قولتله :نعم يقوم الفاجر يكررها تانى :عايز برشامه منوم ساعتها ضغطي علا وعرفت سبب الصداع ايموشن القرف نزل على وشي وقولتله: مافيش حاجه اسمها برشامه منوم "سودتو عيشتنا" 

مره عيل بقي المرادي داخل يقولي: انا عايز برشامه "جميل حلو كمل بقي" عرق 

ساعتها المقص احلو اوي ف عيني كان هيبقي احلى لو كنت عورته بيه حاولت اتحلا باخر شويه برود قولتله: مش فاهمه يعني العيان ماله؟؟ قالى بكل برائه: اصله بيعرق كتير ردي الداخلي: احمس يلا احمس يلا مين ف ام الجو دا مش بيعرق كتير رديت عليه: لا والله ياحبيبي ماعنديش 

فى حزب من الناس كدا عنده اعتقاد ان الدوا دا ساحر المفروض ان من اول يوم علاج انها تخف ..كل المرض يختفي الكحه تقف البرد يختفي وكانه مجاش اصلا وقيس على كدا كل حاجه بتطلع otc

فى حزب تانى بقي لالا هو اغلب الشعب المصري شايف ان حبايه المضاد دى بقي اللى هتجيب من الاخر دى شويه الملح اللى هيظبط الاكله بطنه وجعاه ممكن حبايه مضاد ضرسه وجعه ممكن حبايتين مضاد وحقنه البرد الشهيره عايز بقي فيها حقنه مضاد عشان اعرق كدا والبرد يطلع دا انا روحي هي اللى هتطلع 😓

فى حزب تالت شايف بقي ان الصيدلي دا هو السوبر مان اللى المفروض يكون عارف دوا مداد كوثر بتاع البروستاتا اللى هو ب35 ج ومطلعش ب35 ج اصلا وهي اصلا بعتالي ابنها او حفيدها ازاي ماتعرفهوش ياصيدلي يا فاشل يافاشل يافاشل بتعصبك يا فاشل 😂

ناس بقي تيجي تصرف روشته وهي واقفه ملك وبعد كدا تروح البيت وتكتشف ان الروشته غاليه اوي فتقرر انها ترجعها مع عيل اساله:عايز ترجعها ليه يقولي: اصل هما لقو بابا جاب الروشته انا اقوله : شوف يا اخي سبحان الله الروشتا كانت طالعه بدورين حرقه دم تخليك عايز تولع ف الصيدليه 

حكايه تالته بقي ولا رابعه ولا خامسه ولا التلتاشر الف مابعدش ياجيمي 

دخل عليا شاب محترم بيقولي انا عايز نقط otrivin بس هو عند 14 سنه ياخود انهي قولتله ياخود الكبار وكان تيكيت الصيدليه ملزوق بطريقه مميزه على العلبه من تحت المهم اخدها ومشي رجعلي تانى بيقولي عايز ارجعها عشان بابا جاب واحده.... وداني العلبه بس كانت "otrivin "child المهم انا استغربت هو انا طلعتها غلط ولا ايه ببص على الكود مكتوب adult ...فى سلكين لمسو عندي بس اللى اخدت بالي منه ان الكود كانه حد شاله ولزقه تانى المهم عملت مرتجع ساعتها فهمت هو قالى ان اابوه جاب واحده ابتسمت كدا ابتسامه المحقق كونان بعد ما يربط كل الاحداث ببعض وقولتله: انتو شايلين اللزقه من العلبه بتاعتي وحطينها على العلبه اللي جايبنها من برا الواد حسيته تاه مني مش مجمع قولتله: مش هينفع ترجع بابتسامه سمجه الواد خرج مارجعش تانى بس انا كنت مبسوطه من نفسي فشخ ساعتها عشان فهمت الخزوق قبل ما اتخزوقه😂😂