خناقتي مع رد سجون

 خناقتي الاولى وكانت اول مره اتخانق وصوتي يعلا واتعصب بالشكل دا فى الصيدليه

"كان بقالى يومين مكتئبه وبعيده عن ربنا شويه ومتخانقه كمان ودمي محروق قبليها بيوم ماكنتش متظبطه بمعني اصح وكمان كان يوم جمعه ومش واخده اجازه وتعبانه طول الاسبوع ونازله قرفانه كانت الدنيا جايه عليا دامد يا سي دوني"

كنت فى الصيدليه ولسه فاطره وهعملى كوبايه شاي لقيت شابين داخلين عليا عايزين دا وكانت صوره على الموبيل لشريط جابيماش 800 وما ادراك وعمايل الجابيماش فى الدماغ هيعملك دماغ صح الصح هيعلى معاك لحد ما يحسسك انك ف الجنه 

المهم انا شكيت فيه وقولت: ماعنديش وكانى دوس على رجله او على مزاجه يعني ايهما اقرب بدا يتعصب ويقولي: الدكتور بتاع بليل اخدته منه من قريب ازاى يعني لحق يخلص قولتله: ليه انت واخده من امتى قالى: اول امبارح رديت بهدوء: يعني انت لسه واخد شريط اول امبارح وعايز شريط النهارده تاني قالى: اصل امي بتاخدو وابويا تعبان بياخدو"انا بيني وبين نفسي بقوله بطلو كدب بقي مليتو البلد" رديت عليه: بس هو خلص من عندى 

لقيته قلب تور هايج فى عنبر سبعه وبدا يعلى ف صوته ويتعصب عليا سيبته وروحت اكمل الشاي كان شاي اسود عليا شويه ولقيته واقف قدام الصيدليه عمال يزعق ويتهمني انى مش عايزه اديله العلاج وهو جوا وبيشاور على مكان العلبه ساعتها قلبي وقع ف رجلى دا لو دخل ولقي الشريط انا هتشرح النهارده 👀 

طلعتله بهدوء قولتله ابعد عن باب الصيدليه صوته علا وان دا ملك الحكومه والكلام الحمصي دا سيبته وهو عمال يدوس على اعصابي بصوته العالي وساعتها الناس اتلمت وهو عمال يزعق برا وبيهددنى انه هيكسر الصيدليه ساعتها بقي تخليت عن كل الهدوء ولقيت نفسي بزعقله وصوتي علا وبقوله: عايز تكسر الصيدليه كسرها انت ماتزعقش كدا وبتتكلم كدا ليه اصلا ماعنديش العلاج  والناس تقوله بتحصل عادى انها مايبقاش عندها العلاج ودا بقي مصمم انه مش هيمشي غير لما ياخود الشريط من عندي وكانه بيعند معايا وميعرفش انه مش انا ياحبيبي مش انا اللى يتعند معايا ولو كنت سفاح مش رد سجون لقيته بيقولي: فين الدكتور اللى هنا قولتله: بكل العند والتناكه فى الدنيا انا الدكتوره اللى هنا واطلع اللى انا عايزاه يطلع ومش هطلع اللى انا مش عايزه اطلعه كان داخل تقريبا يضربني بس الناس مسكته وقعد يهدد بقي انه هيكسر الصيدليه واللى فى وسط كل دا رجلى اليمين خانتني كانت بترتعش بطريقه غريبه ماكنتش عارفه اقف عليها كنت مضايقه منها اوي والحمد لله كنت ورا الريون ماحدش كان شايفها كانت هيبتي هتروح 👀

لقيت واحده داخله عليا تقريبا يعرفها وتعرفه بتقولي لو مش عايزه تديهوله اديهوني انا قولتلها ماعنديش وانا عندي جوا😅 اتعصبت بقي الست دى عليه :هو يعني مافيش غير الصيدليه بفلوسك تجيب من اى صيدليه تانيه شويه ومشي بعد بقي ما اعصابي اتحرقت مش باظت وكنت عايزه اعيط واروح بس روحت كملت عمايل كوبايه الشاي 😇