عندما يكون التغير امر واقع
في يوما ما كنت بشرب قهوه وكان معايا واحده صحبتي
بقولها: تعرفي اني بقيت اكره القهوه!!
سالتني باستغراب: ليه !!
قولتلها بسخريه: مش عارفه ما يا اما القهوه اتغيرت او انا اللي اتغيرت!!
قالتلي بنفس الاستغراب:ممكن القهوه اللى هنا بتتباع طعمها وحش
قولتلها: انا جايبه نوع اي حد بيشربه بيشكر فيه دا حتي بابا حبها اوي لما شربها
قالتلي بتكهن: ميرنا بقت تكره القهوه!!!
قولتلها: انا بشربها دلوقتى عشان تفوقني بس
زمان من 3 سنين كنت بستمتع بعمل القهوه و افنن فيها وبستمتع وانا بشربها كدا اياااام!!
فى العادي ان ف الاعياد بيحصل تجمعات فى بيت العيله وكالعاده عشان فى اكبر مني كتير مابيبقاش ليا دور بارز اوي ولا حتي كنت بحاول ان يبقي ليا دور بارز او متشافه حتي بس انا كنت بستمتع اوي باللمه والهزار واللعب وكنت بحب التجمعات دي اوي
اينعم هي قلت شويه وقلت حلاوتها لما كبرنا فى السنين الاخيره بس كانت ليها مكانه ف قلبي وكنت بستمتع وانا بشوفهم بيلعبو حتي وكنت من المعارضين بشده اننا ندبح برا عند الجزار لان ف العادي بندبح ف بيت العيله على السطح تحديدا
اتفاجأت اني من كام يوم اني قولتلهم ما تدبحو عند الجزار دا احسن واريح ليكو
الحقيقه انا اتفاجأت بنفسي ولما فكرت انا حسيت ان لا انا مش عايزه اروح تجمع العيله
انا عايزه اقعد في بيتنا واصحي الصبح على ريحه الكبده وهي بتتشوح على النار ونتجمع ونفطر كبده ونقعد مع بعض فى بيتنا بعيد عن دوشه العيد والدبيح والدم واللحمه
انا بكبر وبتحول لحد تاني
لحد فاقد اساسيات الانبساط
او لحد بينضج ويبقي شخص سخيف
كل سنه وانتو طيبين ❤
تعليقات
إرسال تعليق
اكتبو كومنتات ياجماعه حسسوني انى فى بني ادمين بتقرا اللى بتكتبه